Voor Gronings Vuur tekende ik een aantal verhalen op van bijzondere inwoners van gebiedsdeel Ten Boer.

Nooit verlet

Ien ‘38 zaag zai ien Loppersom eerste licht en lucht van t leven.
Doar op klaai wol t hail best gruien, mit heur zuster stief bie haand.
Grootbrocht op twijde boerenploats woar heur pa dag en deur pokkeln dee.
Boer haar t veur t zeggen, doemen achter hupzelen, deelkiekend op lu en laand.

Zulfs ien oorlog hebben zai en heur volk nooit honger lieden huifd:
moeke weckte greunten, pa slachtte n gehaimgeholden swien.
Onder serre ien t veurhoes kozen drij jongen heur aigen besloten vrijhaid:
laiver dat as dwangaarbaid veur t kwoad. Alles mos dou clandestien.

Noar hbs gingen boerenkiender, dat zai ree op fietske noar hoesholdschoul.
Doarnoa aan t waark ien drogisterij, woar boas enkeld nette wichter bruken kon.
En netjes oogde, dee en prout zai, ien forceerde Nederlandse ainhaidstoal.
Coïtoale veur- en noazörg ston vaaileg achter n deurke, omdat der nog gain Pil beston.

Op kermis en ien Schildweek mos je der as jonkgoud maank wezen.
En doar roakte zai aan proat mit n hail best jong: gainent laiver as hai.
Hai waarkte haard, heurde bie goie kerk en heur ollu mogen hom lieden.
Mit 20 joar is ze traauwd, mor t was gain mouten: gainent blieder as zai.

Zai kon der bielaangs komen: de tering noar de nering zetten.
Heur man aan t waark ien t greun, zai bie hoes mit de wichterkes klaain,
dij morzo groot waren en woar zo vrezelk veul van holden wer.
Mit haand op de knip nooit verlet om sìnten had mit heur baaiden.

Wies mit schoonzeun, wies mit klaainkiender, mor wat n haartzeer
dat noa n dikke haalve aiw soam, hailendaal verguid mit nkander,
(twij geliek geënte bomen, staarkt deur joaarringen, zun en scha)
heur laif heur te tied oetglee, d’ain löskomen mos van d’aander.

Allinneg woont zai ien t schone hoes, dichtbie winkels, dokter en drokte.
Heur kiender as satellieten op n hoanetree zo dichtbie: wotter dunner as bloud.
Mor aander week heurt zai of ze op t aigen nofleke stee blieven mag
of noar de vraide wizzelwonings koal en doods boeten t dörp tou mout.